Grunuð um að skipuleggja árás á lögreglumann

Þremenningarnir, sem voru úrskurðuð í gæsluvarðhald í Héraðsdómi Reykjaness, eru grunuð um að hafa fyrirhugað árás inn á heimili lögreglumanns sem er búsettur á Suðurnesjum. Sá sem er grunaður um að hafa lagt á ráðin um árásina er karlmaður á fertugsaldri. Hann sakaði lögreglumanninn um að hafa stolið fé sem var gert upptækt í húsleit í félagsheimili Outlaws fyrir nokkru.

Dómari úrskuðaði tvo karlmenn og eina konu í gæsluvarðhald vegna málsins í gærkvöld, en ekki var fallist á að úrskurða forsprakka Outlaws, Víði Þorgeirsson í gæsluvarðhald vegna meintrar aðildar hans að málinu. Samkvæmt heimildum Vísis tengist konan, sem úrskurðuð var í gæsluvarðhald, ekki Outlaws með beinum hætti.

Víðir hafnaði alfarið ásökunum um að fyrirhuguð árás tengist klúbbnum í viðtali við RÚV sem birtist í hádeginu. Aðspurður að því á hverju gæsluvarðhaldskrafan var byggð svaraði Víðir: „Bara einhverju rugli sem að þeir ætluðu að reyna að koma okkur inn fyrir."