Fundu 29 múmíur heima hjá virtum sagnfræðingi

Rússneskir lögreglumenn uppgötvuðu á dögunum 29 múmíur heima hjá þekktum sagnfræðingi sem býr í borginni Nizhny Novgorod á bökkum Volgu. Maðurinn virðist hafa um áraraðir grafið upp lík í kirkjugörðum borgarinnar og komið þeim fyrir í stofunni heima hjá sér.

Maðurinn er 45 ára gamall og sagður sérfræðingur í sögu borgarinnar með sérstaka áherslu á kirkjugarða hennar. Rússneskir miðlar greina frá því að öll líkin hafi verið af ungum konum. Málið hefur vakið mikla athygli en af og til í gegnum árin hafa kirkjugarðsstarfsmenn komið að tómum gröfum í borginni. Nú er komin skýring á því.