Dortmund segir Kagawa ekki til sölu

Shinji Kagawa kantmaður Borussia Dortmund er ekki til sölu að sögn Michael Zorc fyrrum leikmanns Dortmund sem nú starfar fyrir félagið. Japanskir fjölmiðlar hafa undanfarið greint frá því að Sir Alex Ferguson knattspyrnustjóri Manchester United horfi hýru auga til leikmannsins.

Kagawa, sem verið hefur frá vegna fótbrots, er samningsbundinn til ársins 2013 og Dortmund vilja ólmir framlengja þann samning.

„Þetta er ekki til umræðu hjá okkur. Kagawa er ekki til sölu. Metnaður okkar er að framlengja samning hans sem fyrst. Við setjumst niður með honum og ræðum málin þegar hann kemur úr sumarfríi,“ sagði Zorc við Sky fréttastofuna.