Þversláin klæddist svörtu og hvítu

KR vann 2-0 sigur á Þór í úrslitaleik Valitor-bikars karla á laugardag. KR-ingar tóku út allan kvótann af bikarmeistaraheppni gegn baráttuglöðum Þórsurum sem skutu fimm sinnum í þverslána. Norðanmenn voru sjálfum sér verstir og KR-ingar lönduðu sínum tólfta titli í sögu félagsins.

Eftir jafnar upphafsmínútur tóku Þórsarar öll völd á vellinum. Þeir sköpuðu sér fjölmörg færi í fyrri hálfleiknum, skutu tvívegis í þverslána og voru ákveðnari í öllum sínum aðgerðum.

„Við mættum feikilega sterku liði og vorum ekki á tánum. Við vorum mjög heppnir að haldast inni í þessu og að fara inn í hálfleikinn marki yfir var ótrúlegt," sagði Skúli Jón Friðgeirsson miðvörður KR í leikslok.

Á lokamínútu fyrri hálfleiksins varð Gunnar Már Guðmundsson Þórsari fyrir því áfalli að skalla boltann í eigið net. Í stað þess að fara marki eða mörkum yfir í leikhléið voru Þórsarar marki undir. en KR-ingar höfðu ekki hitt á markið í öllum hálfleiknum.

Síðari hálfleikur var ekki ósvipaður þeim fyrri. Þórsarar héldu áfram að skjóta í slána úr dauðafærum og þess utan var Hannes Þór öryggið uppmálað í marki KR-inga. Bæði lið gerðu réttmæta kröfu til vítaspyrnu í hálfleiknum en dómara leiksins, Valgeiri Valgeirssyni, voru nokkuð mislagðar hendur í leiknum.

Um miðjan síðari hálfleikinn rak hann Skúla Jón Friðgeirsson af felli í skrautlegu atviki þar sem tveir leikmenn KR fengu gult spjald. Skúli Jón sitt síðara í leiknum. Manni færri virtust KR-ingar hins vegar styrkjast ef eitthvað var. Þórsarar skutu í slá í fimmta skiptið áður en KR-ingar tryggðu sér sigur.

Tíu mínútum fyrir leikslok lagði Mývetningurinn Baldur Sigurðsson boltann fyrir sig á markteig Þórs-liðsins og afgreiddi vel í netið. Tveimur mörkum yfir voru úrslitin ráðin og tólfti bikarmeistaratitill KR í höfn.

KR-ingar betri tíu en ellefu„Við vorum skárri í seinni hálfleik en það kviknaði í rauninni ekki á okkur fyrr en ég var rekinn út af. Þá fannst mér við sigla þessu mjög vel heim," sagði Skúli Jón sem verður í leikbanni í næsta leik KR á Íslandsmótinu. Svo skemmtilega vill til að sá leikur er norðan heiða gegn Þór.

KR-liðið hefur farið á kostum í sumar en leikurinn var líklega þeirra slakasti í sumar. Liðið vann engu að síður 2-0 sigur sem segir ýmislegt um styrkleika liðsins.

„Þetta er ólýsanleg tilfinning. Sérstaklega í ljósi þess að við vorum lélegri aðilinn. Að vinna þetta svona, skora á 82. mínútu. Þetta er ótrúlegt," sagði Baldur Sigurðsson, markaskorari KR-inga.

Páll Viðar Gíslason, þjálfari Þórs, var svekktur en ánægður með frammistöðu sinna manna.

„Ég er stoltur af því að vera Þórsari í dag þrátt fyrir að hafa tapað þessum leik. Það var eitthvað sem ég hef ekki skýringu á sem varð til þess að við skoruðum ekki mörk í þessum leik," sagði Páll Viðar.

Fellur aldrei með litla liðinuGunnar Már, sóknarmaður Þórs, spilaði í úrslitaleik bikarsins í fjórða skiptið á fimm árum. Tvö fyrstu skiptin var hann í liði Fjölnis sem tapaði gegn stórliðum FH og KR. Það má segja að í þeim leikjum líkt og nú hafi hlutirnir ekki fallið með „litla liðinu".

„Nei, allavega ekki í þessum þremur leikjum. Við höfum alls ekki verið síðri aðilinn í leikjunum. 2007 töpuðum við eftir framlengingu, 2008 á sjálfsmarki og hérna komum við þeim á lagið með sjálfsmarki. Þetta er hrikalega sárt og svekkjandi."

Sjálfsmark Gunnar Más var einkar snyrtilegt og í raun afgreiðslan sem Þórsarar leituðu að allan leikinn á hinum enda vallarins.

„Ég vissi af boltanum einhvers staðar fyrir aftan mig. Ég ætlaði að setja hann aftur fyrir en ég hefði átt að sleppa því. Í 80 prósentum tilfella eða meira skallar maður boltann hinum megin við stöngina, í 19 prósentum ver markvörðurinn en þetta var alveg út við stöng," sagði Gunnar Már.

„Það er aldrei gaman að skora sjálfsmark, sérstaklega í svona leik. Nú veit ég hvernig Kristjáni Haukssyni leið eftir leikinn 2008," sagði Gunnar Már en sjálfsmark Kristjáns tryggði KR-ingum bikarinn árið 2008.

Hálfklökkur yfir þessuHannes Þór Halldórsson var frábær í marki KR-inga og þeirra besti maður. Hannes Þór var í liði Fram sem tapaði gegn Breiðablik í úrslitum bikarsins árið 2009 eftir vítaspyrnukeppni.

„Það er versta tilfinning sem ég hef upplifað á fótboltavelli og sat í mér lengi. Ég var staðráðinn í að upplifa hina tilfinninguna í dag. Þetta er jafnæðisilegt og hitt var ógeðslegt."

Það vakti mikla athygli þegar Hannes Þór gekk til liðs við KR að loknu síðasta tímabili. Frammistaða Hannesar í marki Fram virtist hafa dalað og margir sem töldu feril hans á niðurleið. Hann hefur hins vegar farið á kostum í búningi Vesturbæjarliðsins.

„Þetta er fyrsti titillinn sem ég vinn. Ástæðan fyrir því að ég kom í KR var til að upplifa svona stundir og ég er hálfklökkur yfir þessu," sagði Hannes Þór.