Hef aldrei fengið né sóst eftir ofurlaunum

„Það var leitað til mín. Ég var ekki að sækjast eftir starfi nema síður sé,“ segir Vilhjálmur Þ. Vilhjálmsson, fyrrverandi borgarstjóri, sem ráðinn hefur verið framkvæmdastjóri hjúkrunarheimilanna Eirar og Skjóls fram á haust.

Eir og Skjól eru sjálfseignarstofnanir sem starfa samkvæmt lögum og þiggja daggjöld frá ríkinu. Stofnununum er stýrt af stjórnum sem kosnar eru af fulltrúaráðum, Í þau skipa ýmis bæjarfélög og félagasamtök. Vilhjálmur, sem verið hefur stjórnarformaður Eirar í áratug, segir að fyrrverandi forstjóri hafi verið að hætta en á sama tíma var nýtt fulltrúaráð skipað og ný stjórn kosin.

„Það var leitað til mín á þessum tímamótum og ég beðinn um að gera þetta tímabundið,“ segir Vilhjálmur sem hafnar því alfarið að nokkuð sé óeðlilegt við það að hann hafi verið ráðinn tímabundið án auglýsingar. Slíkt tíðkist víða, til dæmis hjá Reykjavíkurborg og ríkinu, og jafnvel til lengri tíma.

Fram kom í Fréttatímanum í gær að forveri Vilhjálms, Sigurður Helgi Guðmundsson, hafi haft samtals 1.440 þúsund krónur á mánuði að bílastyrk meðtöldum. Vilhjálmur segir að að launakjör hans muni taka mið af efnahagsástandinu. Hann verði á eigin bíl og launin lækki um nokkur hundruð þúsund krónur – eins og hann sjálfur hafi lagt til fyrir allnokkru þegar nefnt var að hann myndi taka starfið að sér.

„Ég hef aldrei verið á ofurlaunum og aldrei sóst eftir því,“ segir Vilhjálmur, sem kveður framkvæmdastjórastarfið verða auglýst fljótlega og að hann muni ekki sækja um. „Það er ekki verið að búa í haginn fyrir mig með þessari tímabundnu ráðningu.“- gar