Þolinmæðin á þrotum hjá aðildarfélögum ASÍ

Samninganefnd Alþýðusambands Íslands (ASÍ) beinir því til aðildarfélaga sinna að vísa kjaradeilum til ríkissáttasemjara og undirbúa um leið aðgerðir sem þrýsti á atvinnurekendur og tryggi launahækkanir á þessu ári. „Deilan verður ekki leyst með rökum þegar við mætum bara rökleysu,“ segir Gylfi Arnbjörnsson, forseti ASÍ, og kveður vel geta komið til verkfalla.

Gylfi segir þolinmæðina á þrotum í öllum aðildarfélögum ASÍ, en samninganefnd ASÍ fundaði um stöðu kjaraviðræðna í Karphúsinu í gær. „Þessi uppstilling á sjávarútvegsmálunum hefur haft mjög neikvæð áhrif,“ segir hann og kveður mótsögn í því hjá Samtökum atvinnulífsins (SA) að hafna skammtímasamningi og vilja vinna eftir svonefndri „atvinnuleið“ en hafna um leið aðgerðasamningi til þriggja ára án þess að lausn liggi fyrir í sjávarútvegsmálum. „Það er nokkuð ljóst að okkur miðar ekkert áfram í samtölum við þá.“

Í yfirlýsingu sem Samtök atvinnulífsins (SA) sendu frá sér í gær er áréttað að samningaviðræðum hafi ekki verið slitið þótt gert hafi verið hlé á formlegum fundum fyrir páska. Samtökin segja svonefnda „atvinnuleið“ besta kostinn til að ná þjóðinni út úr kreppunni. „Mikilvægur þáttur í atvinnuleiðinni er gerð kjarasamninga til þriggja ára sem SA vinna enn að því að gera,“ segir í yfirlýsingunni. Um leið segir að ekki sé unnt að gera kjarasamning til þriggja ára án aðkomu stjórnvalda. Skapa verði fyrirtækjum öruggara starfsumhverfi, auk þess sem nást þurfi sátt um málefni sjávarútvegsins.

Gylfi kveðst hins vegar ekki mjög trúaður á að ríkið og SA komist yfir þann ásteytingarstein sem sjávarútvegurinn er. „Mér hefur fundist málinu stillt þannig upp af hálfu atvinnurekenda og stjórnvalda að hvorugur geti vikið. Á milli sitja hins vegar almennir launamenn sem fá ekki launahækkanir.“ Þá skjóti skökku við að mati Gylfa að gengið hafi verið frá þriggja ára kjarasamningi við Elkem án þess að nokkur fyrirvari væri gerður um sjávarútvegsmál. „Mótsagnir af hálfu atvinnurekenda eru því miklar og verður ekki séð að mál verði til lykta leidd án meiri þrýstings.“

Gylfi segir að þótt viðræður séu í deilum einstakra stéttarfélaga sem séu hjá ríkissáttasemjara þá sé það ekki svo milli ASÍ og SA. „Það er einfaldlega af því að það er ekkert um að tala. Þeir hafa hafnað viðræðum.“ olikr@frettabladid.is