Atvinnuvegaráðuneyti vefst fyrir tæpri stjórn

Ríkisstjórnin stendur tæpt. Eftir brotthvarf Ásmundar Einars Daðasonar úr þingliði Vinstri grænna hangir hún á einum manni. Þetta getur valdið henni vandræðum við að koma í gegn málum sem lengi hafa verið á dagskránni.

Eitt þessara mála er stofnun atvinnuvegaráðuneytis. Stefnt hefur verið að því frá valdatöku stjórnarinnar fyrir tveimur árum að steypa iðnaðar- og sjávarútvegs- og landbúnaðarráðuneytunum saman í eitt ráðuneyti atvinnuvega.

Þegar er búið að gera umtalsverðar breytingar á stjórnarráðinu. Velferðarráðuneyti varð til úr heilbrigðis, félags- og tryggingamálaráðuneytum; dómsmál, mannréttindi, samgöngur og sveitarstjórnarmál fluttust í innanríkisráðuneyti; ýmis verkefni fluttust frá fjármála- og forsætisráðuneytinu til efnahags- og viðskiptaráðuneytisins og jafnréttismál fluttust til forsætisráðuneytisins frá félagsmálaráðuneyti, svo fátt eitt sé nefnt.

Stofnun atvinnuvegaráðuneytisins hefur hins vegar trekk í trekk verið frestað, einkum vegna harðrar andstöðu frá hagsmunaaðilum og, það sem meira er, frá Jóni Bjarnasyni, sjávarútvegs- og landbúnaðarráðherra.

En nú lafir stjórnin sem fyrr segir á einum manni – og þar með hefur andstaða Jóns Bjarnasonar býsna mikið að segja. Raunar svo mikið að ef hann fæst ekki til að samþykkja breytingar á stjórnarráðinu þá þarf ríkisstjórnin að treysta á stuðning stjórnarandstöðunnar til að koma málinu í gegn. Og þar er svo sannarlega ekki á vísan að róa.

 

Jóhanna Sigurðardóttir mun fljótlega eftir páska mæla fyrir frumvarpinu um breytingar á stjórnarráðinu. Í því er ekki beint kveðið á um sameiningu þessara tveggja ráðuneyta, en með því er forsætisráðherra veitt lagaheimild til að skipa ráðuneytum og skipta verkefnum milli þeirra eftir eigin höfði.

 

Heimildarmenn Fréttablaðsins eru sammála um að erfitt gæti reynst að koma málinu í gegn en eru þó vongóðir um að það takist að lokum.

 

Að lokinni fyrstu umræðu um frumvarpið fer það inn í allsherjarnefnd þingsins.

Róbert Marshall, formaður nefndarinnar, segir að þrátt fyrir eins manns stjórnarmeirihluta standi enn til að gera þessar breytingar. Í raun hafi lítið breyst við brotthvarf Ásmundar. „Þetta er bara sá meirihluti sem samþykkti fjárlögin og hefur verið í stjórn síðan þá,“ segir hann.

stigur@frettabladid.is