Martraðatímbil Eiðs Smára

Eiður Smári Guðjohnsen sat enn á ný á varamannabekknum er lið hans, Fulham, vann 3-0 sannfærandi sigur á Blackpool í ensku úrvalsdeildinni í gær. Bekkjarseta Eiðs Smára sætir varla tíðindum lengur sem eitt og sér hljóta að teljast skelfileg tíðindi fyrir íslenska knattspyrnu.

Eiður Smári er markahæsti leikmaður íslenska landsliðsins frá upphafi og hefur náð ótrúlegum árangri á sínum ferli. Tveir Englandsmeistaratitlar, Spánarmeistaratitill, spænskur bikarmeistari og Evrópumeistaratitill eftir sigur með Barcelona í Meistaradeild Evrópu svo það helsta sé upptalið. Árangurinn talar sínu máli.

En síðustu tvö ár hafa verið Eiði Smára mjög erfið – frá því að hann var seldur frá Barcelona til AS Monaco í Frakklandi haustið 2009. Síðan þá hefur hann komið við sögu í 39 leikjum með fjórum félagsliðum auk íslenska landsliðsins.

Eftir erfiða tíð í franska boltanum var hann lánaður til Tottenham þar sem hann átti ágætu gengi að fagna. Hann fékk þónokkuð að spila, skoraði tvö mörk og Tottenham tryggði sér sæti í Meistaradeildinni.

Eftir langt sumar varð þó ekkert af því að hann gengi í raðir Tottenham. Hann fór til Stoke, þar sem hann fékk aldrei tækifæri í byrjunarliðinu, og fór þaðan til Fulham í janúar síðastliðnum. Þar hefur lítið betra tekið við og hingað til hefur Mark Hughes, stjóri liðsins, notað hann minna en Tony Pulis gerði hjá Stoke. Til að bæta gráu á svart er hann líka dottinn úr íslenska landsliðinu. Hann var ekki valinn í hópinn fyrir leikinn gegn Kýpur í síðasta mánuði.

Ólafur Jóhannesson landsliðsþjálfari sagði þá að hann hefði ekki rætt sérstaklega við Eið Smára um þá ákvörðun. „Staða hans í Englandi hjá þessum tveimur liðum hefur ekki verið eins og við höfum viljað. Hann er ekki að spila og ég sá ekki ástæðu til þess að velja hann," sagði Ólafur við það tilefni.

Svo virðist sem Eiður Smári sé ekki í myndinni hjá sínum þjálfurum, hvort sem er hjá hans félagsliði eða landsliði. Samanlagður leiktími hans á þessu tímabili nær ekki fjórum heilum knattspyrnuleikjum.

Samningur hans við Fulham rennur út í lok leiktíðarinnar en þrátt fyrir allt þykir ekki útilokað að hann fái aftur samning hjá félaginu í sumar, miðað við fregnir frá Englandi. Fulham hefur vegnað vel síðustu vikurnar og er Eiður sjálfsagt fórnarlamb þeirrar velgengni. Hans kappsmál hlýtur að vera að fá að spila aftur reglulega og er því von á því að hann skoði sín mál rækilega í sumar.

Síðustu tvö tímabil Eiðs Smára Guðjohnsen2009 - 2010

AS Monaco (ágúst - janúar)

11 leikir (8 í byrjunarliði) - 599 mín/0 mörk

Tottenham (janúar - maí)

14 leikir (4) - 546 mín/2 mörk

Íslenska landsliðið

3 leikir (3) - 256 mín/1 mark

Samtals

28 leikir (15) - 1401 mín/3 mörk

2010 - 2011

Stoke (ágúst - janúar)

5 leikir (0 í byrjunarliði) - 128 mín/0 mörk

Fulham (janúar -)

4 leikir (0) - 24 mín/0 mörk

Íslenska landsliðið

2 leikir (2) - 155 mín/0 mörk

Samtals

11 leikir (2) - 307 mínútur/0 mörk