Ríkissaksóknari beitir sér ekki vegna ísbjarnardráps

Ríkissaksóknari hyggst að óbreyttu ekkert aðhafast vegna ísbjarnardrápsins á Hornströndum í síðustu viku. Dýrafræðingur telur að lagaákvæði um friðun hvítabjarna hafi verið brotin.

Samkvæmt lögum eru hvítabirnir friðaðir á Íslandi. Þó má fella hvítabjörn, sem gengið hefur á land, ef fólki og búfénaði er talin stafa hætta af.

Ævar Petersen dýrafræðingur sagði í viðtali á Stöð 2 fyrir helgi að hvítabirnir væru friðaðir, það ætti að vera alger undantekning ef þeir væru felldir og mætti ekki verða almenna reglan. Ef það væri stefna stjórnvalda þyrfti að breyta lögunum.

Björninn sem drepinn var á Hornströndum var á svæði þar sem hvorki er búseta fólks né búfénaður. Engu að síður var hann skotinn án þess að tilraun væri gerð til annarra ráðstafana.

Á Svalbarða gilda þær reglur að menn forðast í lengstu lög að drepa ísbirni en gerist slíkt sætir það undantekningalaust opinberri rannsókn og ef ekki er sýnt fram á nauðvörn mega menn búast við ákæru.

Embætti ríkissaksóknara hyggst ekki að óbreyttu beita sér fyrir slíku. Daði Kristjánsson saksóknari segir að þangað hafi ekki borist ábending né kæra um refsiverða háttsemi í þessu tilviki. Þar líti menn svo á að þetta hafi verið gert í samstarfi Umhverfisstofnunar og lögreglu til að koma í veg fyrir að hættuástand skapaðist. Ekkert hafi fram komið sem bendi til að hér hafi verið framin refsiverð háttsemi. Ef kæra bærist hins vegar um slíkt fengi hún viðeigandi skoðun.