Samningar til þriggja ára háðir ýmsum fyrirvörum

Aðilar vinnumarkaðarins undirrituðu í gær kjarasamning til þriggja ára sem munu tryggja félagsmönnum Alþýðusambands Íslands (ASÍ) almennar launahækkanir upp á 4,25 prósent um næstu mánaðamót og 3,5 og 3,25 prósenta hækkanir á næstu tveimur árum. Samningarnir eru þó háðir ýmsum fyrirvörum um þróun mála.

Fyrir utan fyrrnefndar hækkanir hækka lægstu mánaðarlaun fyrir fulla vinnu upp í 204 þúsund á samningstímanum og launþegar í fullu starfi fá 50 þúsund króna eingreiðslu um næstu mánaðamót.

Við undirskriftina í gær féllust forvígismenn ASÍ og Samtaka atvinnulífsins (SA) í faðma enda lauk með því einhverri hörðustu samningarimmu síðari ára. Samningaferlið hefur staðið frá síðasta hausti og var farið að hilla undir víðtækar verkfallsaðgerðir. Kröfur SA um að framtíðarskipulag sjávarútvegsmála yrði útkljáð voru einn af helstu ásteytingarsteinunum viðræðnanna, en í yfirlýsingu stjórnvalda kom fram að frumvarp um stjórn fiskveiðimála yrði kynnt hagsmunaaðilum í sjávarútvegi áður en það yrði lagt fram á þingi.

Sérstök endurskoðunarákvæði eru í samningunum, en þau lúta að því að kaupmáttur aukist, verðlag haldist stöðugt, gengi krónunnar styrkist og stjórnvöld standi við fyrirheit um aðgerðir í efnahags-, atvinnu- og félagsmálum.

Gylfi Arnbjörnsson, forseti ASÍ, sagði í samtali við Fréttablaðið að undirskrift samninga væri léttir.

„Það er mikið fagnaðarefni að ná að ljúka þessu og að mínu mati eru álitlegir kjarasamningar hér í höfn. Ekki bara út af launahækkunum, heldur er hér komið samkomulag um uppbyggingu næstu þrjú árin.“

Gylfi telur að of mikið hafi verið gert úr hugsanlegum áhrifum launahækkana á verðlag og bendir á að í þeim felist talsverð innspýting fyrir hagkerfið.

Vilmundur Jósefsson, forseti SA, geldur varhug við þeim hækkunum sem eru ekki í samræmi við stefnu samtakanna. Kostnaðarauki atvinnurekenda á samningstímanum er áætlaður um 12,6 prósent. „Þetta er svolítið glannalegt, en ég vona að þetta skili sér þó að maður beri ákveðinn kvíðboga í brjósti. Þetta er hins vegar niðurstaðan og við leggjum tvímælalaust til að samningarnir verði samþykktir.“

Varðandi sjávarútvegsmálin segir Vilmundur aðspurður að SA sé sátt við útspil stjórnvalda. „Við látum það nægja til að ná samningum. Við vildum fá að koma að efnislegri umræðu um málið og að sjávarútveginum yrðu sköpuð góð rekstrarskilyrði. Það er hvort tveggja inni í myndinni hjá ríkisstjórninni og við ætlumst til að hún standi fullkomlega við það.“

Samningarnir verða nú lagðir fyrir aðildarfélög ASÍ og SA og má sennilega vænta niðurstöðu um miðjan mánuð.

thorgils@frettabladid.is