Sjálfumgleði hjá körlum er jákvæður kostur

Karlmenn sem mislesa áhuga kvenna og halda að þeir séu myndarlegri en raun ber vitni eru líklegri til að tryggja framtíð mannkyns en aðrir.

Samkvæmt rannsóknum sálfræðinga við háskólann í Texas eru sjálfumglaðir karlmenn mun líklegri til að finna sér maka en áður var talið. Það eina sem þeir þurfa að gera er að halda ótrauðir áfram - þrátt fyrir að viðtökurnar séu misjafnar.

Sálfræðingurinn Carin Perilloux sá um rannsóknina. Hún telur að sjálfumgleði hjá karlmönnum sé afurð þróunarsögu mannsins. Það sé í raun afar jákvætt að karlmenn láti mótbárur í tilhugalífinu lítið á sig fá.

Perilloux segir það síðan vera enn merkilegra að karlmenn þrói með sér þykkann skráp þegar kemur að neitun. Slíkt viðmót sé einungis til þess gert að auka líkurnar á mökun.

Alls voru 200 stúdentar við háskólann í Texas sem tóku þátt í tilrauninni. 97 karlmenn og 103 konur. Perilloux notaðist við svokallað hraða-stefnumót og lét nemendurnar svara nokkrum spurningum áður en stefnumótin hófust.

Niðurstöðurnar gáfu til kynna að ofmat karlmanna á útliti sínu var mun algengara þegar þeir spjölluðu við myndarlegar konur.