Albert: Vildum ná sigri fyrir Óla

„Við hefðum getað endað ofar en miðað við hvernig sumarið fór er þetta ásættanlegt," sagði Albert Brynjar Ingason, leikmaður Fylkis eftir 3-5 tap gegn FH í Árbænum í dag.

„Við slepptum við allt stress tengt falli, við missum mjög marga í meiðsli og í atvinnumennsku. Þessir ungu strákar eru sumir nýbyrjaðir að mæta á æfingar og eru settir inn í leikinn eftir að hafa æft með okkur í viku,"

„Við höfum verið að gera mikið af sömu mistökunum í sumar, það lekur mark inn og þá brotnar allt og það detta fleiri mörk inn, við komumst vel inn í seinni hálfleik en við náðum ekki að nýta okkur færin,"

Mikið var rætt um stöðu þjálfara Fylkis, Ólaf Þórðarson að hann væri að hætta með liðið fyrir leik.

„Það voru flestir búnir að átta sig á þessu áður en þetta kom í blöðin,það var ekkert búið að staðfesta við okkur en við vildum reyna að ná sigri þar sem við vissum að þetta yrði sennilega seinasti leikurinn hans," sagði Albert.