Leikskólakennarar hækka strax um 7%

Samningar Félags leikskólakennara við Samband íslenskra sveitarfélaga verða kynntir félagsmönnum í dag og næstu daga. Leikskólakennarar munu fá um sjö prósenta hækkun strax, verði samningurinn samþykktur.

Samninganefnd leikskólakennara og sveitarfélaganna skrifuðu undir kjarasamninginn á laugardag, með fyrirvara um samþykki félagsmanna. Ekki hefur fengist upp gefið um hvað var samið í smáatriðum, en leikskólakennarar kröfðust þess að laun þeirra hækkuðu nægilega mikið til að þau yrðu sambærileg við laun grunnskólakennara. Samningurinn mun fela í sér launahækkun til samræmis við laun viðmiðunarstétta, en launin munu hækka í þrepum.

Ekki er hægt að segja nákvæmlega til um hversu mikið launin munu hækka umfram grunnhækkunina fyrr en unnin hefur verið ákveðin greining á launum viðmiðunarstétta, segir Inga Rún Ólafsdóttir, formaður samninganefndar sveitarfélaganna.

Haraldur F. Gíslason, formaður Félags leikskólakennara, segist ánægður með að samningar hafi náðst og að hægt hafi verið að afstýra verkfalli sem boðað hafði verið í dag. „Við náðum markmiðum okkar og erum því mjög sátt við samninginn. Við munum síðan nota vikuna til að kynna samningana vel fyrir félagsmönnum. Ég er líka afskaplega þakklátur fyrir það að ekki komi til verkfalls og finnst ofsalega gott að geta þakkað þeim sem sýndu okkur stuðning með því að afstýra þessu verkfalli," segir Haraldur.

Halldór Halldórsson, formaður Sambands íslenskra sveitarfélaga (SÍS), segir það sama gilda um þessar launahækkanir og aðrar sem samið hafi verið um. Sveitarfélögin verði að hækka skatta eða þjónustugjöld til að mæta hækkuninni eða segja upp starfsfólki. „Í upphafi var lagt upp með það að tekjuaukning myndi standa undir þessum hækkunum en það hefur ekki gengið eftir. Þá verðum við annað hvort að auka tekjur sveitarfélaganna með skattahækkunum eða hærri þjónustugjöldum og svo áframhaldandi niðurskurði og hagræðingu," segir Halldór.

„Þó að leikskólagjöld séu há standa þau ekki undir nema um 16 til 24 prósentum af heildar rekstrarkostnaði leikskólanna í dag." sara@frettabladid.is