Nokkrir bílar skemmdir

Nokkrir bílar voru skemmdir við Þorláksgeisla og þeir mikið rispaðir. Lýst er eftir vitnum að atburðunum.

Þegar Kristján Einarsson, íbúi við Þorláksgeisla 6, kom út í morgun voru fimm bílar utan við hús hans mikið rispaðir. „Þá var klukkan orðinn ellefu og margir farnir til vinnu," sagði Kristján og gerði allt eins ráð fyrir því að mun fleiri bílar væru skemmdir.

Kristján vill ekki giska á fjárhagslegt tjón vegna skemmdanna. „Það hleypur á hundruðum þúsunda, ef ekki meira," segir hann.

Í nótt var einnig forláta drykkjarfontur eyðilagður við Elliðaárnar í Árbæ. Þar var um að ræða grip sem Rótarý klúbbur Árbæjar kom upp árið 2005 til að fegra umhverfi sitt. Mikið virðist því hafa gengið á í Árbæ og Grafarholti í nótt og margir miður sín vegna skemmdarverka.