Áætlanir að sameina vaxta- og húsaleigubætur í eitt kerfi

Velferðarráðherra segir mikilvægt að jafna stöðu þeirra sem eru á leigumarkaði. Áætlanir eru uppi um að leggja sameina vaxtabætur og húsaleigubætur í eitt kerfi. Þær breytingar gætu komið niður á efnameiri einstaklingum sem nú njóta vaxtabóta.

Framkvæmdastjóri Íbúðalánasjóðs sagði í fréttum okkar í gær að sjóðurinn myndir reyna að flýta fyrir framkvæmdum svo eignir í sjóðsins gætu komist í útleigu fyrr en bankarnir og íbúðalánasjóður eiga yfir tvö þúsund íbúðar sem teknar hafa verið eignarnámi. Leiguverð hefur undanfarna mánuði náð sögulegu hámarki og vill velferðarráðherra bæta stöðu leigjenda.

„Þannig ég vona að þetta skýrist á næstu vikum en stefnan er alveg skýr. Við viljum jafna stöðu þeirra sem eru á leigumarkaði og það er forsenda númer eitt tvö og þrjú að fólk geti búið við öryggi og eigi ekki hættu á að það sé selt ofan af því eins og var þarna í þennslunni fyrir hrunið," segir Guðbjartur Hannesson, velferðarráðherra í samtali við fréttastofu.

Pétur Blöndal, þingmaður Sjálfstæðisflokksins gagnrýnir að aðgerðir ríkisstjórnarinnar undanfarið miði eingöngu að skuldsettum fjölskyldum.

Sigríður Ingibjörg Ingadóttir, þingmaður Samfylkingarinnar, hefur leitt samráðshóp um húsnæðisstefnu sem skilaði velferðarráðherra tillögum í apríl. Hún og Pétur hafa farið fram á staða leigjenda verði rædd í félags- og trygginganefnd á fimmtudag. Tillögur hópsins miða að því að vaxtabætur og húsaleigubætur yrðu sameinaðar í húsnæðisbætur árið 2013 en fram að þeim tíma yrðu húsaleigubætur aðlagaðar þeim vaxtabótum sem fólk nýtur í dag.

„Því í dag er það þannig að hjón þar sem annað er á vinnumarkaði þá skerðast húsaleigubæturnir það mikið að það njóti jafnvel engra bóta. Meðan sama fjölskylda ef hún ætti eign myndi fá vaxtabætur," segir Sigríður Ingibjörg.

Þannig að vaxtabætur tekjuhærri einstaklinga gætu hugsanlega verið skertar?

„Já, við lögðum til að það yrði farið í að útfæra kerfið og þá á ég von á því að þeir sem eru allra tekjuhæstir og njóta bóta muni ekki gera það í framtíðinni enda væri það einkennilegt."