Keyra til minningar um látinn félaga

Vinir og félagar Eyþórs Darra Róbertssonar, sem lést í hörmulegu bílslysi á Geirsgötunni, segja mikilvægt að vekja fólk til umhugsunar um öryggi í umferðinni. Þeir hafa skipulagt minningarakstur um vin sinn.

Banaslysið á Geirsgötunni hefur vakið fólk til umhugsunar um hraðakstur. Lögreglan staðfesti í fréttum okkar í gær að frásagnir vitna bentu til þess að ökumaður bílsins hafi verið í spyrnu við annan bíl á ljósunum við mót Lækjargötu og Kalkofnsvegar.

Einn lést í slysinu, Eyþór Darri Róbertsson.

Vinir og fjölskylda Eyþórs minntust hans við slysstað á mánudagskvöld en þá hefði Eyþór orðið átján ára gamall. Nú ætla vinir hans að halda minningarakstur - til að vekja athygli á hættum þess að keyra of hratt í umferðinni og einnig til að heiðra minningu Eyþórs sem var mikill bílaáhugamaður.

Axel Birgisson, vinur Eyþórs, er einn af þeim sem skipuleggur atburðinn.

„Mér datt í hug að gera svona minningarakstur í hans nafni og bjóða hverjum sem er á föstudaginn klukkan tíu. Hvaðan verður lagt af stað. Frá Toys´r us, Reykjanesbrautina og endað á bílaplaninu á Geirsgötunni, slysstaðnum."

„Takmarkið, að sögn Axels, er að vekja athygli fólks á hraðakstri, að fólk taki mark á hámarkshraða og hversu alvarleg svona mál eru."

Hvernig leið þér þegar þú heyrðir fréttirnar?

„Hörmulega, ég er varla að trúa þessu ennþá."

Facebook síðu hópsins sem skipuleggur minningaraksturinn má sjá hér. Þá var missagt í fréttum Stöðvar 2 í kvöld að Eyþór hefði ekki verið í belti. Allir farþegar bílsins voru í belti.