Mælir með því að makinn þekki lykilorðið á Facebook

Stór hluti vandamála í samskiptum fólks í sambúð sem rata inn á borð sálfræðinga tengist samskiptavefnum Facebook. Sálfræðingur segir að lausnin felist í að leyna ekki lykilorði fyrir makanum og hafa allt upp borðum.

Meira en 750 milljónir manna um heim allan nota Facebook, en samskiptasíðan hefur valdið byltingu í samskiptum fólks á netinu.

Ýmis vandamál hafa þó komið upp vegna samskipta fólks á síðunni. Og þá hafa margir lýst áhyggjum sínum um að friðhelgi einkalífs manna sé ekki nægilega vel tryggð á netinu á síðum eins og Facebook.

Eitt af því sem sálfræðingar hafa þurft að glíma við með sínum skjólstæðingum eru vandamál tengd Facebook hjá fólki í sambandi en á Facebook birtast oft gamlir kærastar eða kærustur á vinalistanum sem valda afbrýðisemi eða óöryggi hjá makanum. Þá eru boðleiðirnar stuttar og auðvelt fyrir suma að falla í freistni daðurs á netinu.

Kolbrún Baldursdóttir, sálfræðingur, segist oft þurfa að ráðleggja fólki vegna vandamála sem koma upp í tengslum við Facebook. Kolbrún segir að saklaust spjall á Facebook þróist oft út í eitthvað annað og alvarlegra þótt ásetningur standi ekki til þess.

„Það er kannski ekki ásetningur manna að stofna til kynna, heldur eru hættur þarna, þetta er svolítið lúmskt. Þetta byrjar á einhverju samtali sem fer síðan úr böndunum. Og mitt ráð er ósköp einfalt, það er að engin lykilorð séu leyndarmál," segir Kolbrún.

Kolbrún segist ráðleggja fólki sem leiti til hennar með þessi vandamál að Facebook síðan sé opin makanum þannig að útilokað sé að sá fræjum tortryggninnar.

„Það er bara ein leið, að hafa þetta allt uppi á borðum. Sum hjón hafa jafnvel valið að hafa sameiginlegt netfang þannig að öll skilaboð birtast hjá þeim báðum. Þau sjá þetta þannig saman. Þetta finnst mér í rauninni vera eðlilegt milli hjóna. (...) Hvort sem það er einkabankinn eða Facebook, að það séu engin lykilorð leyndarmál," segir Kolbrún.