Króna fyrir hvern kílómetra

„Auk þessa gríðarlega áfalls sem sjúkdómurinn er, þá er baráttan við hann kostnaðarsöm og við þetta bætast peningaáhyggjur. Þess vegna langaði mig til þess að gera eitthvað til að verða að liði,“ segir Einar Þ. Samúelsson, tæplega fertugur fjölskyldumaður, sem á laugardaginn heldur af stað hjólandi í hringferð um landið.

Tilgangurinn er að safna áheitum til styrktar Kristni Guðmundssyni og aðstandendum systur hans, Bjargar Guðmundsdóttur. Þau Björg og Kristinn hafa bæði hafa glímt við hinn banvæna MND sjúkdóm sem veldur ólæknandi taugahrörnun.

Gengur í erfiðir

Björg lést úr krabbameini 7. júní síðastliðinn eftir að hafa háð erfiða baráttu við bæði krabbameinið og MND. Kristinn glímir enn við MND. Hann er bundinn við hjólastól og er algjörlega upp á aðra kominn.

MND virðist ganga í erfðum innan móðurfjölskyldu Einars. Hulda, systir Bjargar og Kristsins, hefur einnig greinst með sjúkdóminn, en hún er einkennalaus. Einar er systursonur þessa fólks.

Hjólar 1407 kílómetra

Einar leggur af stað í hringferðina frá Furulundi í Heiðmörk laugardaginn 2. júlí, klukkan 7. Hægt er að heita á Einar með því að hringja eða senda sms í númerið 904 1407. Með því er gefin ein króna fyrir hvern kílómetra sem Einar hjólar, alls 1407 krónur. Sú er lengd hringvegarins með Hvalfirði, en hann mun Einar hjóla allan.

Verkefnið hefur fengið nafnið „Á sumu má sigrast“ og má finna allt um það auk leiðarinnar sem Einar hjólar og áningarstöða á heimasíðu verkefnisins. Einnig má fylgjast með á Facebook.