Koma til Reykjavíkur á morgun - allt gengið vonum framar

„Við höfum ekki vigtað okkur ennþá en það eru örugglega einhver kíló farin,“ segir Sveinn Benedikt Rögnvaldsson, sem er einn fjögurra, sem hefur hlaupið hringinn í kringum landið síðustu tvær vikur. Hópurinn er nú staddur í Hvalfirðinum og reikna með að koma í bæinn á morgun klukkan þrjú.

Yfirskrift verkefnisins er „Meðan fæturnir bera mig“ og er tilgangurinn að safna fé fyrir krabbameinssjúk börn en sonur Sveins og eiginkonu hans, Signýjar Gunnarsdóttur, greindist með bráðahvítblæði í janúar á síðasta ári þá þriggja ára gamall.

Hlaupararnir skipta hlaupinu á milli sín, og hafa þau hlaupið um 100 kílómetra dag, hver og einn um 25 kílómetra. Það hefur gengið á ýmsu frá því að þau lögðu af stað þann 2. júní síðastliðinn segir Sveinn.

„Við lentum í alveg brjáluðu veðri á Möðrudalsöræfum, þegar við vöknuðum daginn eftir var um 10 sentimetra þykkt snjólag fyrir utan,“ segir hann. „Svo er einn í hópnum að glíma við meiðsli þannig það hefur gengið á ýmsu. Það er smá þreyta í hópnum en annars hefur þetta gengið vonum framar.“

Sveinn og eiginkona hans hafa ekki verið miklir hlauparar hingað til en eftir að þau ákváðu að fara af stað með verkefnið í vetur æfðu þau mikið.

Hópurinn hleypur um 1350 kílómetra í heildina og gert er ráð fyrir því að koma að Vodafone-vellinum klukkan 15 á morgun þar sem Jón Gnarr, borgarstjóri í Reykjavík, ætlar að taka á móti hópnum. „Það eru einhverjir sem ætla að hlaupa með okkur síðustu kílómetrana,“ segir hann en hægt er að fylgjast með leiðinni sem hópurinn kemur í bæinn á heimasíðu verkefnisins hér.

Hægt er að leggja verkefninu lið en rúmlega níu milljónir hafa safnast.