Eygló hleypur gegn legslímuflakki

Eygló Harðardóttir, þingmaður Framsóknarflokksins, ætlar að hlaupa hálft maraþon í Reykjavíkurmaraþoninu til stuðnings Samtökum kvenna með endómetríósu, eða legslímuflakk.

Eygló var fyrsti flutningsmaður þingsályktunartillögu þar sem lagt er til heilbrigðisráðherra beiti sér fyrir fræðsluátaki um legslímuflakk og að skoðaður verði möguleikinn á stofnun göngudeildar með legslímuflakk.

Eygló var gestur Í Bítinu á Bylgjunni í morgun ásamt Erlu Kristinsdóttur, formanni Samtaka kvenna með endómetríósu.

Þurfti að skafa úr báðum eggjastokkum

Erla greindist með legslímuflakk fyrir um fimm árum síðan. Hún hafði alla tíð verið með afar slæma túrverki og tók greiningin á sjúkdómnum um áratug. Hún þurfti loks að fara í stóra aðgerð þar sem skafið var úr báðum eggjastokkum, brennt úr kviðarholinu auk þess sem fleygur var tekinn úr þvagblöðrunni.

„Það er ekki hægt að lækna þennan sjúkdóm," segir Erla. Hún segir að sér hafi alltaf verið talin trú um að hún væri einfaldlega bara óheppin að vera með svona slæma túrverki.

2-5% kvenna með legslímuflakk

Endómetríósa eða legslímuflakk er krónískur, sársaukafullur sjúkdómur sem orsakakast af því að frumur úr innra lagi legsins finnast á öðrum stöðum í kviðarholinu og valda þar bólgum og blöðrumyndun. Undir venjulegum kringumstæðum fara þessar frumur út úr líkamanum við blæðingar.

Samkvæmt upplýsingum á heimasíðu Samtaka kvenna með endómetríósu

þjást um 2-5% stúlkna og kvenna hér á landi af sjúkdómnum einhvern tímann á

frjósemisskeiði og er því ljóst að um töluverðan fjölda er að ræða. Á 20 ára tímabili greindust um 1.400 konur með sjúkdóminn á Íslandi.

Söfnunarátak í Reykjavíkurmaraþoninu

Eygló hvetur sem flesta til að styrkja samtökin en markmið þeirra er meðal annars að opna göngudeild við Kvennadeild Landspítalans fyrir konur með legslímuflakk. Reykjavíkurmaraþonið fer fram þann 20. ágúst og söfnun áheita hefst í lok maí á síðunni Hlaupastyrkur.

Getur valdið ófrjósemi

Helstu einkenni legslímuflakks eru mikill sársauki við og fyrir blæðingar, miklar og/eða óreglulegar blæðingar, verkir í kviðarholi milli blæðinga, sársauki við egglos, samfarir og þvaglát. Legslímuflakk getur valdið ófrjósemi.

Hlusta má viðtalið við Erlu og Eygló Í bítinu með því að smella á tengilinn hér efst.

Þingsályktunartillöguna má finna hér.