Aðstoðarmaður ráðherra: Úrbætur nauðsynlegar ef rétt reynist

„Það eru alvarlegar fullyrðingar sem koma fram á síðunni. Ef þær standast þá er það alvarlegt mál og það þarf að spyrjast fyrir um það," segir Elías Jón Guðjónsson, aðstoðarmaður mennta- og menningamálaráðherra, sem sendi Guðmundi Franklín Jónssyni tölvupóst þar sem hann óskaði eftir svörum um meinta ritskoðun sem ný fjölmiðlalög eiga að hafa í för með sér.

Elías segist ekki hafa séð neitt sem styðji þær fullyrðingar, sem birtast á undirskriftasíðu sem Guðmundur er ábyrgðamaður fyrir. Elías segir það aftur á móti alvarlegt ef rétt reynist, því hafi hann sent Guðmundi póstinn í vinsamlegum tilgangi til þess að fá skýringar á þessum alvarlegu upplýsingum. Elías segir að ef nýjar upplýsingar kæmu upp úr dúrnum, og væru sannarlega réttar, þá kæmi hann þeim áleiðis til sérfræðinga ráðuneytisins til úrbóta.

Aðspurður hvort hann hafi sent póstinn fyrir hönd ráðherrans, svarar Elías neitandi. Hann hafi sent póstinn í sínu nafni.

Elías segir Guðmund bregðast við póstinum með furðulegum hætti. Hann reyni að gera spurningarnar totryggilegar sem er fráleitt að mati Elíasar.

Hann segir að það yrði til mikilla bóta fyrir umræðu um málið ef Guðmundur myndi svara þessum sex spurningum, enda mikilvægt að allar upplýsingar komi fram í henni.