Lögbann á samingaviðræður milli Akureyrar og SS Byggis

Byggingarfélagið Hamarsfell hefur fengið lögbann á að Akureyrarbær semji við SS Byggi eftir útboð um byggingu Naustaskóla. Fyrirtækið hyggst höfða skaðabótamál á hendur bænum.

Hamarsfell átti í upphafi lægsta tilboðið í verkið en SS Byggi 4. og 5. lægsta. Fimmta apríl, daginn eftir að Akureyrarbær samþykkti og birti tilboð Hamarsfells opinberlega, fékk fyrirtækið hinsvegar senda tilkynningu frá bænum þess efnis að samlagningarvilla að upphæð tæplega áttatíu og fjögurra milljóna króna hafi komið í ljós í tilboði SS Byggis og því ætti það lægsta tilboðið.

„Við fáum engin svör, ekki eitt einasta. Við fáum ekki einu sinni að sjá pappírana við fáum ekki að sjá gögnin sem liggja að baki. Við fáum ekki að vita hvort þetta er Excel villa, innsláttarvilla, mannleg mistök eða neitt. Því miður, þetta er trúnaðarmál," segir Jón Ármann Steinsson, fulltrúi Hamarsfells.

Eftir að hafa farið yfir tölur sem töldust opinberar í tilboði SS Byggis benti Hamarsfell á að útreikningar á virðisaukaskatti væru óraunhæfir þar sem fyrirtækið áætlaði bænum endurgreiðslu upp á 65 milljónir króna. Akureyrarbær lækkaði í kjölfarið endurgreiðslutölur virðisauka fyrir hönd SS Byggis um tíu milljónir. Ef Hamarsfell vill viðhalda lögbanninu þarf fyrirtækið að greiða bænum 66 milljónir króna tryggingu.

„Þér að segja þá efast ég um að það sé skynsamlegt fyrir fyrirtæki sem stendur í miklum framkvæmdum að binda 66 milljónir í svona deilu, sem er í raun og veru bara augljós ormagryfjuspillingarvitleysa. Þetta er eins og Kardimommubærinn. Við finnum bara aðrar leiðir," segir Jón Ármann.

Hamarsfell undirbýr nú skaðabótamál gegn bænum.