Forsetinn hefur staðfest fjölmiðlalögin

Forseti Íslands, Ólafur Ragnar Grímsson, hefur staðfest ný heildarlög um fjölmiðla. Alþingi afgreiddi lögin þann 15. apríl og voru þau þá send forsetanum til staðfestingar.

Staðfesting forsetans á lögunum hefur verið tilkynnt í Stjórnartíðindum og er þar dagsett þann 20. apríl, fyrir tveimur dögum.

Lögin hafa verið nokkuð umdeild, einna helst fyrir að í þeim er gert ráð fyrir að sett verði á laggirnar svokölluð fjölmiðlanefnd. Í fyrri drögum að frumvarpinu kallaðist hún reyndar fjölmiðlastofa. Eftir fjölda athugasemda var nafninu breytt, en gagnrýnendur fjölmiðlanefndar segja breytinguna nánast eingöngu felast í nafinu. Valdsvið nefndarinnar sé enn of vítt og illa skilgreint.

Fjölmiðlanefnd er ætlað að hafa eftirlit með framkvæmd fjölmiðlalaganna og daglega stjórnsýslu þeim tengdum. Ekki er hægt að skjóta ákvörðunum fjölmiðlanefndar til annarra stjórnvalda.

Nefndin getur ekki aðeins fjallað um mál sem til hennar er skotið, heldur getur hún einnig skoðað mál að eigin frumkvæði. Á grundvelli sérstakrar rannsóknarheimildar sem nefndin hefur getur hún krafið fjölmiðla um gögn vegna meintra brota gegn fjölmiðlalögunum. Ef fjölmiðill verður ekki við þeirri beiðni getur nefndin lagt dagssetkir á miðilinn, allt að 200 þúsund á dag.

Blaðamannafélag Íslands og Félag fjölmiðlakvenna eru meðal þeirra sem telja fjölmörg atriði nýrra laga varhugaverð.

Við afgreiðslu laganna á Alþingi greiddu 30 þingmenn atkvæði með lögunum en 14 þingmenn voru á móti, allir þrettán þingmenn Sjálfstæðisflokksins auk eins þingmanns Framsóknarflokksins 19 þingmenn voru fjarverandi á meðan að atkvæðagreiðslan fór fram.

Afar umdeild fjölmiðlalög voru afgreidd frá Alþingi árið 2004 og synjaði forseti staðfestingu þeirra.

Undirskriftarsöfnin var hafin vegna nýju laganna en aðeins skrifuðu um fjögur þúsund manns undir.