Krefjast þess að stjórnin beiti sér fyrir eldsneytislækkunum

Samtökin Landsbyggðin lifi krefjast þess að ríkistjórnin beiti áhrifum sínum til þess að verð á bílaeldsneyti verði lækkað. Samtökin segja stjórnvöld hafa tvo augljósa kosti í stöðunni. Annar sé að stórlækka eða afnema eldsneytisskatta en hinn er að gera kröfu á olíufélögin um lægri álagningu.

„Hátt verð á dísilolíu og bensíni er að verða meiri háttar vandamál, sérstaklega í dreifbýlinu,“ segir í ályktun stjórnar. „Leiðir  til að fá þjónustu, komast í  verslun  eða stunda félagslíf eru langar, svo ekki sé nú minnst á það hve dýrt er að komast til höfuðstaðarins. Flutningskostnaður á vöru og þjónustu er orðinn óbærilegur fyrir byggðirnar.“

Í greinargerð með ályktuninni segir að það sé rangt og óréttlátt að leggja háa skatta á eldsneyti á þeirri forsendu að það leiði til þess að fólk noti  þá minna af því. „Í nútímaþjóðfélagi eru bílar sem ganga fyrir olíu eða bensíni  nauðsyn, en ekki  lúxus.“

Þá segir ennfremur að álagning olíufélaganna sé allt of há. „Þetta er afar einfaldur rekstur. Vegna bruðls og óhófs virðast þau mörg á jötunni  hjá okkur skattgreiðendum, sem auk okursins þurfa nú líka að borga þau út úr eigin skuldasúpu. Geti olíufélögin ekki selt okkur eldsneyti  með eðlilegri álagningu, væri rétt að kanna hvort ríkiseinkasala mundi ekki gagnast okkur betur.“