Ólafur Stígsson hættur við að hætta

Ólafur Stígsson hefur ákveðið að taka skóna úr hillunni og leika áfram með Fylkismönnum á komandi leiktíð. Hann hafði lagt þá á hilluna eftir frábært tímabil í fyrra.

Fram kemur á heimasíðu Fylkis að illa hafi gengið að fylla skarð hans í leikjum undirbúningstímabilsins.

„Eftir nokkra umhugsun ákvað Óli Stígs að verða við beiðni okkar og erum við honum þakklátir fyrir það," segir á heimasíðunni. Ólafur er leikjahæsti leikmaður Fylkis frá upphafi. Hann var valinn leikmaður ársins hjá félaginu síðasta sumar.