Messi skoraði sitt fyrsta landsliðsmark í 637 mínútur

Lionel Messi skoraði langþráð landsliðsmark í 4-1 sigri Argentínumanna á heimsmeisturum Spánverja í vináttulandsleik í Buenos Aires í gær. Messi hafði þá ekki skorað í 637 mínútur með argentínska landsliðinu.

Mark Lionel Messi var "klassískt Messi-mark". Hann fékk stutta stungusendingu inn í teiginn frá Carlos Tevez (ala Xavi), tók boltann með sér og lyfti síðan boltanum á afslappðan og yfirvegaðan hátt yfir bæði varnarmenn og markmann Spánar sem komu á fullu á móti honum.

Lionel Messi hefur farið á kostum með Barcelona síðustu tímabil, skoraði 47 mörk í 53 leikjum með Barca á síðasta tímabil og hefur skorað 4 mörk í 3 leikjum á þessu tímabili.

Messi hafði hinsvegar ekki skorað fyrir landsliðið síðan í 1-2 tapi fyrir Spáni 14. nóvember 2009. Síðustu tvö landsliðsmörk kappans hafa því bæði komið á móti Spánverjum þar sem fjölmargir liðsfélagar hans hjá Barcelona spila.

Það mætti því halda að Messi finni sig ekki nema ef að liðsfélgar hans í Barcelona eru með honum á vellinum hvort sem að þeir séu með honum í liði eða í liði andstæðinganna.