Vill ekki veita neinum aðila fullt aðgengi að börnum

„Það væri í raun handvömm ef við settum okkur ekki einhverjar viðmiðunarreglur til framtíðar. Ég er menntaður kennari og get síst hugsað mér það að við veitum fullt aðgengi allra að börnunum," segir Margrét Sverrisdóttir, formaður mannréttindaráðs Reykjavíkurborgar.

Endurskoðaðar tillögur um samskipti menntastofnana Reykjavíkurborgar við kirkjuna voru til umræðu á fundi mannréttindaráðs í dag. Þeim verður nú vísað til menntaráðs til umsagnar. Margrét segir að þar komi væntanlega fram einhverjar tillögur sem mannréttindaráð muni taka tillit til.

Margrét segir að við endurskoðun tillögunnar hafi orðalagi verið breytt og það mildað. Þá hafi verið skoðuð viðmið sem Þjóðkirkjan samþykkti árið 2008 um samskipti kirkjunnar við skóla. „Þessar reglur tókum við og skoðuðum og höfðum til hliðsjónar þegar að við vorum að endursemja þetta. Og það er mjög lítið sem okkur greinir á um miðað við þær viðmiðanir," segir Margrét. Þá segir hún að málsmeðferðin sem lögð er til skipti líka máli. „Það er að tillagan gildir til reynslu í tvö ár og verði endurskoðuð að þeim tíma liðnum ef þörf krefur," segir Margrét.



Er sjálf í Þjóðkirkjunni

Tillaga mannréttindaráðs var mjög umdeild fyrst þegar að umræðan um hana upphófst. Margrét segist hafa fengið miklu meira af jákvæðum viðbrögðum eftir því sem leið á umræðuna. „Þessu var bara stillt þannig upp að það væri verið að ráðast á Þjóðkirkjuna, sem var alls ekki raunin," segir Margrét.

Margrét segist sjálf vera í Þjóðkirkjunni. „Ég er í Þjóðkirkjunni og hef látið ferma og skíra og gifta mig í kirkju," segir Margrét. Hún segist telja að starfsemi á borð við Æskulýðsstarf kirkjunnar og KFUM- og K muni lifa góðu lífi hér eftir sem hingað til og bendir á að það sé starfsemi sem fari einmitt ekki fram á skólatíma. „Þannig að ég held nú að fólk þurfi engu að kvíða," segir Margrét.