Wenger óskaði Teiti til hamingju

Arsene Wenger, knattspyrnustjóri Arsenal, sendi Teiti Þórðarsyni góðar kveðjur og óskaði honum til hamingju með nýja samninginn hjá Vancouver Whitecaps.

Skilaboðin voru tekin upp á myndband og spiluð á blaðamannafundi Whitecaps í gær þegar tilkynnt var að Teitur yrði þjálfari liðsins á fyrsta ári þess í bandarísku MLS-atvinnumannadeildinni.

Wenger og Teitur þekkjast frá fornu fari en Wenger var einn aðstoðarþjálfara Cannes í Frakklandi þegar Teitur spilaði með liðinu snemma á níunda áratug síðustu aldar.

Teitur hefur verið þjálfari Whitecaps frá 2007 en liðið mun þreyta frumraun sína í MLS-deildinni á næsta ári.