Strípalingurinn er ekki KR-ingur

Eftirminnileg uppákoma varð undir lok bikarúrslitaleiks FH og KR um helgina þegar maður klæddur sundskýlu einni fata hljóp inn á völlinn með neyðarblys í hendi.

Talað hefur verið um að maðurinn hafi verið stuðningsmaður KR en Kristinn Kjærnested, formaður knattspyrnudeildar KR, segir það ekki rétt að maðurinn styðji KR í yfirlýsingu sem hann hefur sent frá sér.

Yfirlýsing Kristins Kjærnested:

Ég vil fyrir hönd stjórnar knattspyrnudeildar KR þakka þeim fjölmörgu sem lögðu okkur lið vegna úrslitaleik Visa-bikarins síðastliðinn laugardag.  Því miður þá endaði dagurinn ekki vel fyrir okkur KR-inga en hamingjuóskum til FH-inga er hér með komið áleiðis.  Þeir eru verðugir VISA-bikarhafar 2010.

Okkur finnst ómakleg umfjöllun nokkurra fjölmiðla í svokölluðum meintum ólátum þar sem að sumir hverjir setja alla stuðningsmenn KR undir sök fárra einstaklinga. Okkur þykir mjög leitt hvernig örfáir einstaklingar höguðu sér undir lok leiksins. 

Það er t.a.m. með öllu óásættanlegt að kveikt hafið verið á blysum undir lok leiksins en stjórn deildarinnar, framkvæmdarstjóri og formaður KR-klúbbsins ítrekuðu margsinnis að meðferð flugelda/blysa væri (eins og öllum ætti að vera kunnugt um) stranglega bönnuð og gæti haft alvarlegar afleiðingar fyrir félagið og jafnvel enn verra, verið mikil slysahætta fyrir hinn almenna stuðningsmann í stúkunni. 

Ábyrgð félagsins getur hinsvegar ekki verið takmarkalaus en við klárlega fordæmum gjörninginn.  KR-ingar hafa alltaf reynt eftir fremsta megni að koma heiðarlega fram og það er klárt mál að 99% stuðningsmanna voru félaginu til mikils sóma, nú sem endranær.  Þess skal svo einnig getið að svokallaður strípalingur og hlaupagikkur er ekki KR-ingur en ku hafa búsetu við bæjarmörkin.

Við vitum ekki til þess að nokkur einustu átök hafi komið upp á milli stuðningsmanna liðanna en öll samskipti hafa þar ávallt verið til fyrirmyndar.  Harðræði var að sögn beitt að leik loknum af yfirvöldum gegn örfáum stuðningsmönnum okkar.  Tilefnislaust að margra mati sem voru nærri og algjörlega óþarft en knattspyrnudeild KR ætlar þar til gerðum yfirvöldum ekki annað en að þeir hafa verið að sinna sínum skyldum.

Við KR-ingar erum öllu vanir og þrátt fyrir vonbrigðin höldum við reisn, mætum tilbúnir í síðasta þriðjung Íslandsmótsins, sameinaðir, allir sem einn !  Guð blessi Ísland .... og KR.

Með baráttu og KR-kveðjum,

Kristinn Kjærnested