Hiddink hættir með Rússa

Guus Hiddink hefur staðfest að hann muni hætta að þjálfa rússneska landsliðið þegar samningur hans rennur út í sumar.

Hiddink fór með rússneska landsliðið í lokakeppni EM 2008 en mistókst að koma liðinu á HM í sumar. Rússar töpuðu fyrir Slóveníu í umspili um laust sæti á HM.

Fjölmörg félög, sem og landslið, hafa áhuga á að fá þennan snjalla þjálfara í vinnu en hann vildi fyrst af öllu ræða við Rússa áður en hann tæki ákvörðun um framhaldið.

Á meðal þeirra liða sem eru sögð hafa áhuga á Hiddink eru Man. City, Juventus, Liverpool og Heerenveen. Landsliðin sem eru orðuð við þjálfarann eru Tyrkland og Nígería.