Varað við óveðri undir Eyjafjöllum og við Reynisfjall

Mjög hvasst er víða á Suðausturlandi og varar Vegagerðin sérstaklega við óveðri undir Eyjafjöllum og við Reynisfjall.

Í tilkynningu frá Vegagerðinni kemur fram að á Vestfjörðum er ófært yfir Hrafnseyrarheiði. Óveður og hálka er á Steingrímsfjarðarheiði, einnig á Klettshálsi og Hálfdáni. Þá eru hálkublettir á fjallvegum og í Ísafjarðardjúpi.

Á Norðurlandi er hálka og skafrenningur á Öxnadalsheiði og á Víkurskarði. Á norðausturhorninu eru hálkublettir, hálka og víða skafrenningur. Þæfingsfærð er á Hólasandi.

Á Austurlandi er ófært og óveður á Fjarðarheiði en þungfært og skafrenningur er á Vopnafjarðarheiði. Hálka og skafrenningur er svo á Möðrudalsöræfum og á Oddskarði. Snjóþekja og hálkublettir eru annars á öðrum leiðum.