Holland í úrslit á HM

Holland bókaði í kvöld farseðilinn í úrslitaleik HM í Suður-Afríku er liðið vann sanngjarnan sigur á Úrúgvæ, 3-2.

Fyrsta færi leiksins kom strax á 4. mínútu. Dirk Kuyt fékk þá nægan tíma í teignum en skot hans fór yfir markið. Þarna hefði Kuyt átt að gera mikið betur.

Leikurinn var frekar rólegur eftir þetta og það var nákvæmlega ekkert að gerast þegar bakvörðurinn Giovanni Van Bronckhorst lét vaða á markið af um 35 metra færi.

Hann hitti boltann fullkomlega því hann fór nánast í samskeytin og þaðan í netið. Algjört draumamark sem kom á 18. mínútu leiksins.

Úrúgvæar voru í vandræðum með að byggja upp sóknir og gekk þess utan ekki vel að koma Diego Forlan inn í leikinn. Þegar fimm mínútur voru eftir af fyrri hálfleik fékk Forlan þó boltann á miðjum vallarhelmingi Hollands.

Hann fékk tíma til þess að koma sér í skotfæri utan teigs. Þessi frábæri skotmaður lét vaða og boltinn kom í miklum sveig á mitt markið og í netið. Stekelenburg misreiknaði flug boltans og hefði líklega átt að gera betur. 1-1.

Síðari hálfleikur var stál í stál þó svo Hollendingar væru meira með boltann. Fyrsta markverða sem gerðist í seinni hálfleik var þegar Stekelenburg varð aukaspyrnu Forlan afar vel á 67. mínútu.

Það vaknaði líf eftir aukaspyrnu Forlan því aðeins mínútu síðar komst Van der Vaart í dauðafæri sem var varið. Boltinn barst til Robben en skot hans var slakt og yfir markið.

Hollendingar fylgdu því eftir og á 70. mínútu kom Wesley Sneijder Hollendingum yfir með heppnismarki. Hann átti þá skot í teignum sem fór í varnarmann Úrúgvæ og af varnarmanninum lak boltinn í fjærhornið.

Hollendingar voru ekki hættir því þrem mínútum síðar stangaði Arjen Robben boltann smekklega í netið eftir sendingu Dirk Kuyt.

Úrúgvæ virtist vera búið að gefast upp þegar Maxi Pereira skoraði fyrir Úrúgvæ í uppbótartíma. Rúm mínúta eftir og allir fram hjá Úrúgvæ. Tíminn þó of naumur en Úrúgvæ var ansi nálægt því að jafna.

Holland-Úrúgvæ  3-2

1-0 Giovanni Van Bronckhorst (18.)

1-1 Diego Forlan (41.)

2-1 Wesley Sneijder (70.)

3-1 Arjen Robben (73.)

3-2 Maxi Pereira (90.+1)