Umfjöllun: FH líður betur í Njarðvík en Keflavík

Íslandsmeistarar FH unnu 3-2 útisigur á Keflavík í hörkuskemmtilegum bikarslag á Njarðtaksvellinum í kvöld. Þeir verða því í pottinum þegar dregið verður í átta liða úrslitin á morgun. FH-ingum hefur gengið erfiðlega í Keflavík undanfarin ár en þeim líður greinilega betur í Njarðvík.

Keflvíkingar voru betri aðilinn í fyrri hálfleik og varnarmenn liðsins voru ekki í teljandi vandræðum með sóknaraðgerðir FH lengst af. Guðmundur Steinarsson átti fyrstu alvöru marktilraun heimamanna en skaut yfir þegar hann hefði frekar átt að gefa á Paul McShane sem var laus í teignum.

Undir lok hálfleiksins færðist meira bit í sóknir FH-inga en fyrsta alvöru færi þeirra kom á 38. mínútu þegar Atli Viðar Björnsson átti stórhættulegt skot sem Keflavík bjargaði í horn. Skömmu síðar skall hurð ansi nærri hælum hinumegin þegar boltinn dansaði rétt fyrir framan marklínuna á marki FH en endaði loks í höndum Gunnleifs Gunnleifssonar. Heimamenn vildu reyndar fá vítaspyrnu þar sem þeir töldu að útileikmaður FH hefði varið knöttinn með hendi en þeim varð ekki að ósk sinni.

Í uppbótartíma fyrri hálfleiks komust FH-ingar síðan yfir þegar Ólafur Páll Snorrason skoraði úr teignum eftir sendingu frá Atla Viðari.

Það var jafnræði með liðunum í seinni hálfleik fram að því að FH-ingar bættu við öðru marki sínu. Eftir glæsilega sóknarlotu Fimleikafélagsins braut Guðjón Árni Antoníusson á Atla Guðnasyni í teignum og Kristinn Jakobsson átti ekki annarra kosta völ en benda á punktinn.

Tommy Nielsen tók spyrnuna og skoraði af feykilegu öryggi. Fjórum mínútum síðar hleypti Paul McShane spennu í leikinn á ný þegar hann skoraði fallegt mark með föstu skoti og staðan orðin 1-2.

Atli Guðnason bætti við þriðja marki Fimleikafélagsins með skalla. Sex mínútum fyrir leikslok skoraði fyrirliðinn Haraldur Freyr Guðmundsson fyrir Keflavík og minnkaði muninn í 2-3 sem urðu lokatölur. Undir lokin átti Keflavík nokkrar hættulegar sóknir og spennan var mikil en Hafnfirðingar fögnuðu í leikslok.

FH-liðið er komið á gott skrið og er kominn ákveðinn meistarabragur á það. Það refsar fyrir mistök og þó liðið sé ekki alltaf að spila neinn glæsibolta er það alltaf líklegt til að skora. Þannig var liðið í kvöld.

Keflavík - FH 2-3

0-1 Ólafur Páll Snorrason (45.)

0-2 Tommy Nielsen (71.)

1-2 Paul McShane (75.)

1-3 Atli Guðnason (80.)

2-3 Haraldur Freyr Guðmundsson (84.)

Keflavík

Ómar Jóhannsson

Guðjón Árni Antoníusson

Haraldur Freyr Guðmundsson

Bjarni Hólm Aðalsteinsson

Alen Sutej

Magnús Þórir Matthíasson

Hólmar Örn Rúnarsson

Paul McShane

Andri Steinn Birgisson

(29. Einar Orri Einarsson)

Magnús Sverrir Þorsteinsson

(74. Ómar Karl Sigurðsson)

Guðmundur Steinarsson

FH

Gunnleifur Gunnleifsson

Guðmundur Sævarsson

Pétur Viðarsson

Tommy Nielsen

Hjörtur Logi Valgarðsson

Björn Daníel Sverrisson

Hákon Atli Hallfreðsson

(29. Jacob Neestrup)

Matthías Vilhjálmsson

Atli Guðnason

Ólafur Páll Snorrason

(74. Torger Motland)

Atli Viðar Björnsson