Ögmundur: Hrikaleg tíðindi

Ögmundur Jónasson, þingmaður Vinstri grænna, segir samkomulag Magma Energy og Geysir Green Energy um að Magma kaupi öll hlutabréf Geysis í HS-Orku vera hrikaleg tíðindi. Alþingi og ríkisstjórnin verði að grípa í taumana.

Kaupverðið er 16 milljarðar króna og verður það greitt með reiðufé og yfirtöku skuldabréfa. Með Kaupunum verður Magma langstærsti hlutahafi í HS Orku með yfir 98% hlut. Fram kemur í tilkynningu sem félögin sendu frá sér í morgun að íslenska ríkið muni eiga forkaupsrétt að eignarhlut Magma Energy í HS Orku kjósi Magma að selja sinn hlut.

Ögmundur segir þetta vera hrikaleg tíðindi. „Mér finnst þetta hrikalegt. Það er náttúrlega seint í rassinn gripið að ætla að gera eitthvað í málinu núna en ég vill engu að síður að það verði skoðað. Við munum fara yfir málið á þingflokksfundi sem hefst klukkan hálf tvö og sjá hvað hægt er að gera í stöðunni. Það er greinilegt að þeir sem véla með þetta á markaði eru gersneyddir öllu sem að heitir ábyrgðarkennd gagnvart sínu samfélagi. Þá er það náttúrulega stjórnvalda, löggjafans og ríkisstjórnar, að grípa í taumanna. Ef að það er ekki gert og ef að við stöndum ekki vörð um auðlindar okkar betur en þetta þá eru við hreinlega að falla á prófinu."

Verðmæt auðlind sem á að vera í samfélagseigu

Ögmundur segir að skoða verði hvernig ríkisstjórnin og Alþingi geti gripið í taumana. Hann bendir á að Vinstri grænir í Reykjanesbæ íhugi að fara með málið fyrir dómstóla. „Það er ein leið en síðan vil ég að farið verði rækilega yfir þetta í dag og að allir kostir í stöðunni verði skoðaðir."

Þá segir Ögmundur að erlendir aðilar eigi ekki að eignast orkufyrirtæki hér á landi. „Vegna þess að þetta er verðmæt auðlind sem á að vera í eigu samfélagsins. Þessir erlendu aðilar eru hvorki Rauði krossinn né Hjálpræðisherinn. Þetta eru fjárfestar sem ætla að hafa hagnað af fjárfestingu sinni."