Sol eða Silvestre byrjar í vörn Arsenal í kvöld

Arsene Wenger, stjóri Arsenal, segist treysta Sol Campbell til þess að taka ákvörðun um hvort hann sé nógu ferskur til þess að byrja leikinn gegn Barcelona í kvöld eður ei.

Arsenal er í meiðslavandræðum og að öllu eðlilegu myndi Campbell byrja leikinn í kvöld. Wenger hefur þó áhyggjur af líkamlegu ástandi leikmannsins sem spilaði líka um helgina.

„Ég vildi hafa Alex Song til þess að spila í vörninni en hann er ekki leikhæfur þannig að valið stendur á milli Sol og Silvestre. Það er ekki að vinna með Sol að þetta yrði hans annar leikur á fjórum dögum og það er heldur ekki gott að vera með Silvestre og Vermaelen saman því þeir eru báðir vinstri fótar leikmenn," sagði Wenger.

„Ég mun taka ákvörðunina en Sol er nógu reynslumikill til þess að segja mér satt um hvort hann sé nógu ferskur til þess að spila. Ég treysti honum fullkomlega til þess að haga sér á ábyrgan hátt og segja satt frá. Hann er ekki á neinu egótrippi og vill ekki bregðast liðinu."