Ronaldo ætlar að hætta á næsta ári - brot af því besta (myndband)

Brasilíski snillingurinn Ronaldo hefur tilkynnt að hann ætli að leggja skóna á hilluna frægu þegar núgildandi samningur hans við Corinthians rennur út.

„Ég mun spila til 31. desember árið 2011 þegar samningur minn rennur út og þá mun ég hætta í fótbolta.

Ég mun gera allt sem í mínu valdi stendur til þess að hjálpa liðinu að vinna titla fram að því," segir hinn 33 ára gamli Ronaldo í viðtali við vefmiðilinn Globoesporte.com í dag.

Ronaldo gerði garðinn frægan með félögum á borð við PSV, Barcelona, Real Madrid, Inter og AC Milan og varð þrisvar sinnum valinn besti leikmaður heims af FIFA og hlaut tvisvar sinnum Ballon d'Or.

Ronaldo var einnig sigursæll með brasilíska landsliðinu þar sem hann varð heimsmeistari með liðinu í tvígang og er jafnframt markahæsti leikmaður í sögu HM.

Ronaldo skoraði 62 mörk í 97 landsleikjum fyrir Brasilíu en hnémeiðsli hafa sett strik í reikninginn á ferli þessa frábæra framherja. Ronaldo sýndi oft á tíðum yfirnáttúruleg tilþrif á vellinu og gerir sjálfsagt enn í brasilíska boltanum þrátt fyrir að vera örlítið þyngri nú en þegar hann var upp á sitt besta.

Með því að smella hér er hægt að sjá myndband með nokkrum tilþrifum kappans.