Umfjöllun: Langþráður sigur Fylkis

Fylkir vann  góðan 2-1 sigur gegn Grindavík á Grindavíkurvelli í dag í níundu umferð Pepsi-deildar karla.  Jóhann Þórhallsson skoraði bæði mörk gestanna en það var Grétar Ólafur Hjartarson sem skoraði mark Grindvíkinga.

Ólafur Örn Bjarnason, þjálfari Grindvíkinga, gerði fjórar breytingar á byrjunarliðinu frá tapinu gegn KA í bikarnum í vikunni . Rúnar Dór Daníelsson, Páll Guðmundsson , Ray Anthony Jónsson og Jóhann Helgi Aðalgeirsson komu allir inn í liðið. Ólafur Örn gat aftur á móti ekki verið viðstaddur leikinn þar sem hann var farinn út til Noregs til að klára samning sinn við Brann. Það var því Milan Stefan Jankovic sem stýrði Grindavík í leiknum.

Ólafur Þórðarson, þjálfari Fylkis, gerði þrjár breytingar á sínu liði frá tapinu gegn Fram í Visa - bikarnum í vikunni.  Ásgeir Örn Arnþórsson, Valur Fannar Gíslason og Jóhann Þórhallsson komu inn í liðið. Ásgeir Börkur Ásgeirsson , Andrés Már Jóhannesson  og Ólafur Þórðarson , þjálfari Fylkis, fengu allir rautt spjald í bikarslagnum gegn Fram í vikunni og tóku því út leikbann. Kristinn H. Guðbrandsson aðstoðarmaður Ólafs stýrði því Fylkisliðinu í dag.

Fyrir leiki dagsins voru Grindvíkingar í næstneðsta sæti Pepsi-deildarinnar með sex stig og Fylkir  í því níunda með átta stig. Því var um sannkallaðan sex stiga leik að ræða, en með sigri gátu heimamenn komust upp fyrir Fylkismenn og úr fallsæti.

Leikurinn hófst með miklum látum en strax á annarri mínútu leiksins kom fyrsta markið. Ingimundur Níels Óskarsson prjónaði sig í gegn um vörn Grindvíkinga og kom skoti á markið sem hafnaði í stönginni. Boltinn barst út í teiginn þar sem Jóhann Þórhallsson var mættur og renndi boltanum í autt markið.

Eftir mark Fylkismanna virtust gestirnir ætla láta kné fylgja kviði og  pressuðu mikið að marki Grindvíkinga næsta stundarfjórðunginn en náðu ekki að nýta sér það . Þegar líða tók á fyrri hálfleikinn komust heimamenn meira í takt við leikinn og komust í nokkur góð færi en allt kom fyrir ekki og staðan því 0-1 í hálfleik.

Gestirnir byrjuðu síðari hálfleikinn með miklum krafti  en Jóhann Þórhallsson fékk tvö dauðafæri í upphafi síðari hálfleiks. Það voru samt heimamenn sem náðu að jafna leikinn á 59.mínútu en markið kom þvert gegn gangi leiksins.

Það var reynsluboltinn Grétar Ólafur Hjartason sem  skoraði virkilega fínt mark eftir sendingu frá Scott Ramsey. Scott Ramsey tók aukaspyrnu rétt fyrir utan vítateig Fylkismanna og  renndi boltanum til Grétars sem skaut boltanum laglega framhjá Fjalari Þorgeirssyni í marki Fylkismanna.

Eftir mark heimamanna þá leit allt út fyrir það að  Grindvíkingar  myndu jafnvel ná inn öðru marki.  Á 68. mínútu komst  Jósef  Kristinn Jósefsson í  algjört dauðafæri einn á móti Fjalari Þorgeirssyni í markinu en hann sá við honum og varði vel. Fylkisvörnin stóðst pressuna frá Grindvíkingum og hægt og rólega fóru þeir að taka öll völd á vellinu.

Albert Brynjar Ingason slapp einn í gegnum vörn Grindvíkinga  á 81.mínútu og átti fínt skot að marki Grindvíkinga en Rúnar Þór Daníelsson varði frábærlega.

Eftir mikla pressu frá Fylkismönnum þá var eitthvað undan að láta. Jóhann Þórhallsson kórónaði flottan leik sinn með marki , fjórum mínútum fyrir lok venjulegs leiktíma. Hann sótti hratt upp vinstri kantinn,  dansaði í gegnum vörn Grindvíkinga sem endaði með þrumu skoti  alveg óverjandi fyrir Rúnar í markinu.

Grindvíkingar reyndu eins og þeir gátu að jafna metinn undir lokin en allt kom fyrir ekki og því fyrstu sigur Fylkismanna í rúman mánuð í höfn. Fylkismenn náðu í þrjú mikilvæg stig í botnbaráttunni og eru núna með 11 stig í áttunda sæti, en  Grindvíkingar eru ennþá í næstneðsta sæti Pepsi-deildarinnar með 6 stig.

Grindavík - Fylkir 1-2

0-1 Jóhann Þórhallsson (2.)

1-1 Grétar Ólafur Hjartarson (59.)

1-2 Jóhann Þórhallsson (86.)

Grindavíkurvöllur - Áhorfendur: 594

Dómari: Vilhjálmur Alvar Þórarinsson 6

Skot (á mark): 8-13 (5-8)

Varin skot: Rúnar 5 – Fjalar 4

Horn: 3-7

Aukaspyrnur fengnar: 15-16

Rangstöður: 4-2

Grindavík (4-4-2):

Rúnar Dór Daníelsson 7

Jósef Kristinn Jósefsson 6

Auðun Helgason 5

Loic Mbang Ondo 6

Ray Anthony Jónsson 5

Jóhann Helgi Aðalgeirsson 6

(46. Óli Baldur Bjarnason 6 )

Jóhann Helgason 6

Páll Guðmundsson 5

Scott Mckenna Ramsay 7

Grétar Ólafur Hjartarson  7

(77. Guðmundur Egill Bergsteinsson - )

Gilles Daniel Mbang Ondo  6

Fylkir (4-5-1):

Fjalar Þorgeirsson 7

Kjartan Ágúst Breiðdal  6

Einar Pétursson  6

( 73. Andri Þór Jónsson 6)

Valur Fannar Gíslason 6

Þórir Hannesson 5

Jóhann Þórhallsson 8 – maður leiksins

Kristján Valdimarsson 6

Ólafur Ingi Stígsson 7

Ásgeir Örn Arnþórsson 5

( 69. Pape Mamadou Faye 6)

Ingimundur Níels Óskarsson 7

(87. Tómas Þorsteinsson -)

Albert Brynjar Ingason 6

Fylgst var með leiknum á Boltavakt Vísis og Fréttablaðsins. Til þess að sjá lýsinguna er hægt að smella hér: Grindavík - Fylkir