Hreyfingin vill ekki norrænan sáttasemjara

Þingmenn Hreyfingarinnar vilja ekki að fenginn verði sáttasemjari frá Norðurlöndum til að miðla málum í Icesave deilunni. Ekki sé á það treystandi að sáttasemjari komi frá landi sem hafi beitt Íslendinga þrýstingi í málinu.

Ekki er útilokað að aftur verði gengið til samningaviðræðna um Icesave við Hollendinga og Breta. Ríkisstjórnin hefur fundað með stjórnarandstöðunni til að finna þverpólitískan sáttaflöt í málinu, meðal annars til að ákveða samningsmarkmið.

Fram kemur í Fréttablaðinu í dag að lagt sé upp um með að fenginn verði utanaðkomandi sáttasemjari til að stýra viðræðum.

Lilja Mósesdóttir, þingmaður VG, hefur lagt til að Joschka Fischer, fyrrverandi utanríkisráðherra Þýskalands, verði falið það hlutverk.

Birgitta Jónsdóttir, þingmaður Hreyfingarinnar, telur rétt að leita til Frakklands eða Bandaríkjanna. Hins vegar komi ekki til greina að fá sáttasemjara frá Norðurlöndum. „Við gerum þá kröfu að hann verði ekki frá Norðurlöndum. Sömu löndum og sett hafa á okkur þumalskrúfu í Icesave málinu."