Lippi vongóður um að Nesta snúi aftur í landsliðið

Landsliðsþjálfarinn Marcello Lippi hjá Ítalíu gerir nú allt sem í sínu valdi stendur til þess að sannfæra varnarmanninn Alessandro Nesta um að snúa aftur í ítalka landsliðið.

Hinn 33 ára gamli Nesta hafði áður gefið það út að hann væri hættur að spila fyrir landsliðið en ferill leikmannsins hefur verið litaður af slæmum meiðslum síðustu ár.

Nesta virðist nú hins vegar aftur kominn í sitt besta form með AC Milan og því vonast Lippi til að geta notað hann á lokakeppni HM næsta sumar en það gæti reynst erfitt að sannfæra Nesta því hann meiddist bæði á lokakeppni HM árið 1998 og árið 2002.

„Hann hefur ekki beint verið heppinn með meiðsli á lokakeppnunum til þess en ég er búinn að tala við hann og við skulum bíða og sjá hvað gerist," sagði Lippi vongóður í viðtali við Gazzetta dello Sport. Nesta á að baki 78 landsleiki á tíu ára landsliðsferli sínum með Ítalíu.