Healy dottin úr norður-írska landsliðinu

David Healy, leikmaður Sunderland og markahæsti leikmaður norður-írska landsiðsins frá upphafi, hefur misst sæti sitt í landsliðinu.

Healy var ekki valinn í hópinn fyrir leik liðsins gegn Marokkó þann 17. nóvember. Alls hefur hann skorað 35 mörk í 84 leikjum með landsliðinu en hann er 30 ára gamall.

Honum hefur heldur ekki gengið vel með félagsliði sínu og var hann á dögunum lánaður til Doncaster í ensku B-deildinni. Engu að síður skoraði hann í sínum fyrsta leik með liðinu um helgina, sigurmarkið í 2-1 sigri á Millwall.

Healy vakti mikla athygli þegar hann skoraði þrettán mörk í ellefu leikjum Norður-Írlands í undankeppni EM 2008. Það er met sem enn stendur í dag.