Del Bosque: Því minna sem Torres spilar því betra

Vicente Del Bosque, þjálfari spænska landsliðsins, er sennilega ekki vinsæll meðal stuðningsmanna Liverpool eftir að hann lét hafa það eftir sér að því minna sem Fernando Torres spilar því betra.

Fernando Torres, leikmaður Liverpool, hefur verið að glíma við meiðsli í vetur og aðeins byrjað fjórtán leiki fyrir liðið á tímabilinu. Liverpool-menn eiga ekki von á honum aftur á völlinn fyrr en í næsta mánuði en spánverjinn er að jafna sig á hnémeiðslum.

„Við viljum fá Torres  ferskan fyrir mótið og það geta aðeins verið góðar fréttir fyrir landsliðið. Við vonum að missir Liverpool verði styrkur okkar því Fernando Torres spilar lykilhlutverk í hópnum,“ sagði Del Bosque við News of the world.

Del Bosque sagði við News of the World að það væri lykilatriði fyrir spænska landsliðið að Torres verði klár og fái góða hvíld áður en HM 2010 hefst.

„Því minna sem Torres spilar því betra fyrir okkur. Við viljum ekki að hann spili of marga leiki með Liverpool svo að hann verði búinn að jafna sig á meiðslum og fái hvíld áður en HM 2010 hefst.“