Anelka í átján leikja bann - Evra í fimm leikja bann

Landsliðsferill Frakkans Nicolas Anelka gæti verið á enda eftir að hann var dæmdur í átján leikja bann frá franska landsliðinu vegna hegðunar sinnar á HM í Suður-Afríku.

Anelka var rekinn heim af mótinu í kjölfar þess að hann gagnrýndi þjálfarann harkalega í leikhléi eins leiks. Hann fékk tækifæri til að biðjast afsökunar. Hann afþakkaði og var sendur heim.

Í kjölfarið varð allt vitlaust í herbúðum franska landsliðsins og aganefnd franska knattspyrnusambandsins hefur nú ákveðið að senda Anelka í langt bann.

Uppreisn varð í franska liðinu á HM en hana leiddi fyrirliðinn Patrice Evra. Hann var dæmdur í fimm leikja bann frá franska landsliðinu.

Franck Ribery fær þriggja leikja bann fyrir sinn þátt í skandalnum og Jeremy Toulalan var dæmdur í eins leiks bann.