Blanc: Frakkland þarf alla sína bestu menn til að komast á EM 2012

Laurent Blanc, þjálfari franska landsliðsins, er ekki alltof sáttur með aðgerðir franska knattspyrnusambandsins að setja nokkra landsliðsmenn sína í bann fyrir þáttöku þeirra í verkfallsaðgerðunum á HM í Suður-Afríku í sumar.

Nicolas Anelka, Patrice Evra, Franck Ribery og Jeremy Toulalan fengu allir bann þó að þau séu mislöng. Evra fékk fimm leiki, Ribery þrjá og Toulalan einn. Anelka var hinsvegar dæmdur í 18 leikja bann.

„Ég veit að leikmennirnir eiga möguleika á því að áfrýja þessum bönnum en þetta er augljóslega ekki bestu kringumstæðurnar fyrir franska fótboltann. Frakkland þarf alla sína bestu leikmenn til að komast á EM 2012," sagði Laurent Blanc í viðtali á heimsíðu franska sambandsins.

„Ég var að vonast eftir því að geta lokað bókinni um Suður-Afríku förina í ágúst og ég taldi það vera rétta og nægilega refsingu að banna alla HM-leikmennina í leiknum á móti Noregi. Það gekk hinsvegar ekki eftir," sagði Laurent Blanc og bætti við.

„Nú einbeitum við okkur bara af því að setja saman okkar besta hugsanlega lið fyrir leikina á móti Hvíta-Rússlandi og Bosníu í byrjun september," sagði Laurent Blanc.