Edda: Það er stutt í að við getum lyft okkur ennþá hærra

Edda Garðarsdóttir, átti sinn besta leik á Evrópumótinu á móti Þjóðverjum í dag og það kom vel út að láta Söru Björk Gunnarsdóttur spila við hliðina á henni á miðjunni.

„Þetta sýnir okkur að það er stutt í að við getum lyft okkur ennþá hærra og getað orðið að liði sem vinnur svona leiki," sagði Edda og bætti við:

„Við náðum að halda þeim þokkalega í skefjum. Varnarskipulagið sem við lögðum upp með gekk þokkalega hjá okkur. Við náðum líka nokkrum góðum sóknum á þær og við fengum tvö stór hættuleg færi," sagði Edda.

„Það voru allir að vinna saman sem eitt lið frá fremsta manni til þess aftasta. Þar er lykillinn að okkar velgengi. Við erum ekki að spila einhvern sambabolta og trítla í gegnum þessar varnir en ef við erum fastar fyrir og höldum boltanum betur þá getum við orðið enn betri," segir Edda.

„Þrátt fyrir að við séum bara 300 þúsund á Íslandi og það séu ekki svo margar stelpur á Íslandi í fótbolta þá erum við með gott lið. Ef við höldum áfram að bæta okkur eins og við höfum gert síðustu árin þá getum farið að vinna Frakkland og Þýskaland," sagði Edda og var ekkert að draga í land með það.

„Karakterinn var góður í þessu liði fyrir mótið en svona mikið álag hefur bara þjappað okkur enn betur saman. Okkur langar öllum í meira og að komast lengra," sagði Edda að lokum.