Selfoss upp í Pepsi-deild karla

Selfoss er komið upp í Pepsi-deild karla í knattspyrnu eftir sigur á Aftureldingu á heimavelli í dag. Gríðarlegur fögnuður er nú á Selfossi en þetta er í fyrsta sinn sem Selfoss mun spila í efstu deild.

Selfoss vann leikinn í kvöld 6-1 og er með 44 stig eftir 20 leiki. Haukar koma næst á eftir með 38 stig og HK hefur 35 þegar tvær umferðir eru eftir.

Hjörtur Júlíus Hjartarson skoraði þrennu fyrir Selfoss, Sævar Þór Gíslason tvö mörk og Arilíus Marteinsson það sjötta og síðasta. Afturelding hafði komist yfir í leiknum en liðið er nú fallið í 2. deild.

Hjörtur hefur þá skorað tíu mörk fyrir Selfoss í aðeins níu leikjum og Sævar 19 mörk í 20 leikjum.

Gunnlaugur Jónsson hefur gert frábæra hluti með lið Selfoss sem hann tók við eftir síðasta sumar. Hann lék á árum áður með ÍA og síðar KR og hefur spilað með Selfyssingum í sumar.

Selfoss hefur unnið 14 af 20 leikjum sínum í sumar, gert tvö jafntefli og tapað fjórum leikjum. Liðið hefur skorað 47 mörk og fengið á sig 21 mörk.