Man. Utd aftur á toppinn - jafntefli hjá Chelsea

Manchester United skellti sér á topp ensku úrvalsdeildarinnar á nýjan leik með 2-0 sigri á Portsmouth á Old Trafford í kvöld. United því komið með þriggja stiga forskot á Liverpool og á þess utan leik inni.

Wayne Rooney skoraði fyrra markið strax á 9. mínútu og Michael Carrick innsiglaði sigurinn á 82. mínútu.

Mörk United hefðu hæglega getað orðið fleiri og sérstaklega fór Ryan Giggs illa að ráði sínu.

Portsmouth átti sín tækifæri í stöðunni 1-0 en nýtti þau ekki. Hermann Hreiðarsson var í byrjunarliði Portsmouth og lék allan leikinn.

Á sama tíma hituðu Chelsea og Everton upp fyrir bikarúrslitaleikinn. Leikurinn í kvöld lofar þó ekki góðu fyrir bikarúrslitin því hann varð markalaus.

Drogba fékk besta færi Chelsea í uppbótartíma en skot hans fór í slána.

Chelsea í þriðja sæti deildarinnar með 68 stig eða sex stigum minna en Man. Utd.