Jamie Oliver bjargar beikoninu

Breski sjónvarpskokkurinn Jamie Oliver kemur nú þarlendum svínakjötsiðnaði til bjargar og hvetur landa sína til að velja breskt beikon umfram innflutt.

Kokkurinn klæðalausi leggur staðreyndirnar kviknaktar á borðið og heldur því fram að breskur svínakjötsiðnaður verði minningin ein áður en áratugur er liðinn sýni neytendur ekki samhug í verki og kaupi innlendar svínaafurðir.

Þær innfluttu eru vissulega ódýrari og engin furða að svínabændurnir eigi í vök að verjast með tekjuöflun sína á þessum síðustu og verstu þegar hinn almenni Breti lætur fremur stjórnast af hagsýni en gegndarlausri nautnahyggju. En ekki hvað? Tala atvinnulausra í Bretlandi er nálægt tveimur milljónum og sennilega eru háleitar hugsjónir um velferð svínabænda landsins í besta falli aftarlega á merinni þegar hugað er að kvöldverðinum.

Oliver gengur svo hart fram í málflutningi sínum að hann hefur hleypt af stokkunum heilli þáttaröð sem gengur undir heitinu Jamie Saves our Bacon, eða Jamie bjargar beikoninu, og spyr þar áleitinnar spurningar: Eigum við það skilið að komið sé fram við okkur eins og fífl? og vísar þar til neytenda. Svarið er auðvitað nei svo innlent skal svínið vera.