Vill samþykkja Icesave samning í þágu umhverfismála

Árni Finnsson, formaður Náttúruverndarsamtaka Íslands, skorar á Guðfríði Lilju Grétarsdóttur, formann þingflokks VG, að styðja ríkisstjórnina í Icesave málinu. Hann segist óttast að ríkisstjórnin muni að öðrum kosti falla og öll þau góðu mál sem hún gæti komið fram. „Þar á ég ekki síst við umhverfismálin þar sem gríðarlega mikið starf er óunnið og annað hefur drabbast niður í tíð Framsóknar- og Sjálfstæðisflokks í umhverfisráðuneytinum," segir Árni í opnu bréfi sem birt er á vefnum Smugunni.

„Samninganefnd Íslands undir forustu Svavars Gestssonar náði viðunandi samningi í afar þröngri samningsstöðu. Svo góðum að tæpast verður samið á ný í von um að betra samkomulag náist. Þú veist vafalaust betur en ég að hollensk og bresk stjórnvöld telja sig hafa gert nokkuð vel við Ísland," segir Árni í bréfinu.

Árni segir að jafn lengi og stjórnarandstaðan viti að ríkisstjórnin hafi ekki meirihluta á Alþingi - meðal þingmanna stjórnarflokkanna - fyrir afgreiðslu frumvarps um ríkisábyrgð vegna Icesave þá muni hún ekki semja um neina fyrirvara heldur fella ríkisstjórnina.