Bruce pirraður út í forráðamenn Tottenham

Framherjinn Darren Bent er ekki sá eini sem er pirraður yfir fyrirhugðum félagsskiptum hans frá Tottenham til Sunderland en leikmaðurinn lét óánægju sína í ljós á Twitter-síðu sinni þar sem hann fór ófögrum orðum um Daniel Levy stjórnarformann Tottenham.

Knattspyrnustjórinn Steve Bruce hjá Sunderland er ekki síður pirraður yfir gangi mála og skilur ekki af hverju félagsskiptin eru búin að dragast jafn mikið á langinn og raun ber vitni um.

„Það er gríðarlega svekkjandi hvað þetta er búið að taka langan tíma. Í tvígang hef ég verið fullviss um að loksins væri þetta í höfn en þá breytist eitthvað á síðustu stundu.

Einhvers staðar verðum við samt að draga línuna ef að þetta heldur áfram með þessum hætti. Við erum búnir að missa af öðrum leikmönnum sem við höfðum áhuga á vegna þess tíma sem við erum búnir að vera að eyða í að fá Bent til félagsins og það er ekki gott," segir Bruce í viðtali við Sky Sports fréttastofuna.