Bruce sármóðgaður yfir ummælum Blanc

Knattspyrnustjórinn Steve Bruce hjá Sunderland tók ummælum knattspyrnustjórans Laurent Blanc hjá Bordeaux afar illa en Frakkinn lét hafa eftir sér að Sunderland væri ekki stórlið og því myndi Bordeaux ekki selja framherjann Marouane Chamakh þangað.

Chamakh hefur verið orðaður við mörg stórlið undanfarið og Blanc segir ekki koma til greina að hann fari í lið eins og Sunderland, frekar verði hann þá áfram í Frakklandi. Bruce finnst ummælin óþörf og ófyrirleitin.

„Ég veit að Blanc vann frönsku deildina á síðasta ári og það er fínt hjá honum en hann á ekki að tala niður til annarra félaga út af því. Ég veit ekki hvað hann heldur að hann sé eiginlega. Við vildum bara koma til skila að við hefðum áhuga á leikmanni þeirra og þetta fáum við í staðinn.

Þetta er móðgandi og ég myndi aldrei segja eitthvað svona um önnur félög. Ég veit ekki hvað hann kallar stórlið heldur en ég veit alla vega að við fáum miklu fleiri áhorfendur á leiki hjá okkur en þeir fá hjá sér," er haft eftir bálreiðum Bruce.